Siglir tar il cuntegn

Exteriur Tirchia: L'attentader da suicidi è stà in uffant

In'attatga cun bumbas sin ina festa da nozzas en il sidost da la Tirchia chaschuna almain 50 unfrendas. E var 70 persunas sajan vegnidas blessadas. L'uffant che ha fatg l'attatga aveva tenor il president tirc Recep Tayyip Erdogan tranter 12 e 14 onns.

Ina via suenter in'attatga da bumba
Legenda: Suenter l’attatga è la situaziun a Gaziantep stada nunsurvesaivla. Keystone

L'explosiun en la citad da Gaziantep è succedida en in quartier cun blers abitants curds. Tenor l’agentura da novitads Anadolu è la bumba explodida amez ina societad da nozzas che festegiava or en il liber. Supponì vegn in’attatga da suicidi. Il president tirc Recep Tayyip Erdogan ha condemnà «l’attatga terroristica».

En la regiun che cunfinescha cun la Siria datti adina puspè attatgas. Extremists da diversas gruppas èn activs là, uschia era la gruppa da terror Stadi Islamic. Fin uss n'ha dentant nagin surpiglià la responsabladad per l'attatga.

RR novitads 06:00++