Tirchia fa arrestar autur tudestg en Spagna

L'autur tudestg cun ragischs tircas, Dogan Akhanli, è vegnì arrestà durant sias vacanzas en Spagna – quai sin in cumond d'arrest da la Tirchia.

L'autur Dogan Akhanli.

Legenda da maletgs: Sin cumond d'arrest da la Tirchia è l'autur tudestg, Dogan Akhanli vegnì arrestà en Spagna. Keystone

L’autur tudestg cun ragischs tircas, Dogan Akhanli è vegnì arrestà en Spagna, sin cumond da la Tirchia. La polizia haja arrestà Akhanli sin fundament d'in cumond d'arrest internaziunal, quai ha declerà ses advocat envers l'agentura da novitads DPA. Il departament da l'exteriur da la Germania ha confermà l'arrestaziun.

L'um da 60 onns saja vegnì arrestà a Granada, nua ch’el fascheva vacanzas. Tge che la Tirchia reproscha ad el n'è anc betg cler. Sch'el vegn surdà a la giustia tirca sto la giustia spagnola ussa decider.

L’autur da Cologna è davent da 1985 enfin 1987 stà arrestà en ina praschun militara ad Istanbul. Il 1991 ha la Germania renconuschì el sco fugitiv politic. Dapi lura viva Akhanli en Germania. El ha sulettamain il dretg da naziunalitad da la Germania.

RR novitads 18:00