En il decurs da l'avantmezdi ha er il president Recep Tayyip Erdogan sez dà giu sia vusch tar il referendum che duai dar ad el dapli pussanza. Erdogan ha fatg quai en ina scola media ad Istanbul. I na saja ina votaziun sco autras, i giaja per prender ina decisiun extra-ordinaria ha il president tirc ditg a schurnalists.
Entant recloma l'opposiziun curda che la polizia tirca chatschia lur observaders or dals locals da vuschar.
Il referendum duai pussibiltar ina midada fundamentala
La midada da la constituziun è dispitaivla, perquai ch'ella eliminass per gronda part la separaziun da las pussanzas en Tirchia. Tranter auter avess il president la cumpetenza da nominar e relaschar derschaders e parlamentaris.
55,3 milliuns en Tirchia – 2,9 milliuns en il mund
En 33 provinzas en l’ost han avri ils locals da votaziun la bun’ura las 07:00. En las autras 48 provinzas ha cumenzà la votaziun in’ura pli tard. En Tirchia èn clamads 55,3 milliuns burgais cun dretgs da vuschar a l’urna.
En tut il mund vivan ulteriurs 2,9 milliuns tircs e tircas cun dretg da vuschar. Ellas ed els han dentant gia vuschà. Ils locals da votaziun serran la dumengia las 16:00 temp local en il ost ed in’ura pli tard er en il vest.
Cun emprims resultats da la votaziun èsi da quintar il decurs da questa saira.
RR novitads 06:00++
