Siglir tar il cuntegn
Inhalt

Exteriur Tirchia attatga curds en Siria

Suenter attatgas ord l'aria sin miras da l'organisaziun terroristica Stadi Islamic en la Siria e da la partida curda PKK en l'Irac ha la Tirchia era bumbardà vitgs en il nord da la Siria ch'èn sut la controlla dals curds.

Aviun F-16-Bomber
Legenda: Aviun da cumbat tirc: La Tirchia resta tar las attatgas or da l’aria. Reuters

Sco la milissa curda YPG communitgescha, hajan tancs sajettà sin plirs vitgs. 4 cumbattants e plirs civilists sajan vegnids blessads. In pledader da la regenza tirca ha confermà che las forzas armadas sajan vegnidas attatgadas ed hajan silsuenter sajettà enavos. La milissa curda YPG cumbatta il Stadi Islamic ed è il pli impurtant allià dals Stadis Unids en la regiun.

Naginas truppas terrestras, dentant protecziun or da l'aria

Glindesdi aveva la Tirchia ditg ch'ella n'haja betg l'intenziun dad ir cun truppas terrestras en Siria. Dentant veglian els proteger or da l'aria rebels moderads che cumbattian en la Siria cunter la gruppa da terror Stadi islamic, ha il minister da l'exteriur tirc Ahmet Davutoglu ditg.

La fin d'emna aveva la Tirchia fatg attatgas or da l'aria en ils stadis vischinants, la Siria e l'Irac. Dasper ils terrorists dal Stadi islamic han las attatgas era gì en mira champs da la partida curda PKK. Il mardi duai il cussegl da la NATO sa cussegliar davart las acziuns, quai sin giavisch da la Tirchia.

RR novitads 6:00