Siglir tar il cuntegn
cuntegn

Exteriur Tirchia: Arrestaziuns ed ulteriuras mesiras

En connex cun l'attatga terroristica sin ina festa da Silvester ad Istanbul ha la polizia arrestà duas persunas estras al port aviatic Atatürk. Quai rapporta l'agentura da novitads DHA. Las duas persunas sajan dadas en egl e vegnidas arrestadas.

Brandenburger Tor.
Legenda: Er Berlin regorda da las unfrendas da l'ultima attatga en Tirchia. Keystone

Suenter l'attatga da terror sin ina festa da Silvester ad Istanbul tschertga la polizia tirca vinavant l'attentader. Las autoritads tircas han publitgà maletgs nua che la fatscha da l'um suspectà è da vesair cleramain.

Er registraziuns da cameras da surveglianza èn vegnidas publitgadas. L'agentura da novitads DHA ha rapportà ch'ina truppa d'anti-terror haja manà tras in'acziun il glindesdi saira. Participads eran helicopters ed er vias èn vegnidas serradas. Davart arrestaziuns a questa razzia n'è enconuschent nagut. L'attentat ha chaschunà 39 morts.

Attatgà miras da l'uschenumnà Stadi Islamic

Dapi l'attentat da Son Silvester ad Istanbul ha l'armada tirca attatgà almain 150 basas da l'organisaziun terroristica Stadi Islamic en il nord da la Siria. Quai rapporta l'agentura da novitads tirca Anadolu. Da las attatgas cun aviuns, tancs e bittarachetas sajan 18 terrorists vegnids mazzads e plirs tozzels blessads.

Obama telefonescha cun Erdogan

Suenter l’attatga ad Istanbul ha il president dals Stadis Unids Barack Obama telefonà cun il president tirc Recep Tayyip Erdogan. Tenor ina communicaziun da la regenza americana ha Obama exprimì sia cumpassiun. Plinavant han Obama e Erdogan suttastritgà lur intenziun dad agir ensemen cunter il terrorissem.

Prolungaziun dal stadi d'urgenza

Entant ha il parlament tirc prolungà il stadi d’urgenza anc ina giada per ulteriurs trais mais. El era vegnì proclamà suenter l’emprova da putsch la stad passada.

RR novitads 12:00