Il cumbat cunter extremists militants duai esser pussaivels senza stuair resguardar dretgs umans. Per la primminister May pudess ina metoda da cumbat cunter il terrorissem esser da restrenscher la mobilitad da persunas suspectadas.
Suenter las attatgas terroristicas da Manchester e Londra è la primministra sut squitsch: Sco ministra da l’intern è ella stada responsabla che 20milli plazzas tar la polizia èn vegnidas stritgadas.
Ulteriura persuna arrestada a Manchester
Bun duas emnas suenter l’attatga terroristica a Manchester è in’ulteriura persuna vegnida arrestada. La polizia ha arrestà l’um da 38 onns a la plazza aviatica da Heathrow a Londra. El duaja avair cuntrafatg a las leschas d’anti-terror. Sia arrestaziun saja stada planisada. Quai ha communitgà la polizia da Manchester. En tut ha la polizia arrestà 19 persunas en connex cun l’attatga. 12 ha ella entant puspè laschà liber. Ils 22 da matg èn mortas passa 20 persunas tar in’attatga da suicidi suenter in concert a Manchester.
RR novitads 06:00