Siglir tar il cuntegn
Inhalt

Exteriur Tgi cumbatta cun tge interess en Siria

Mintga di datti novitads da la Siria. Da tegnair la survista è fitg grev perquai ch'il conflict è fitg cumplex. Nus avain pruvà da dar ina survista dal conflict ensemen cun Pascal Weber, il correspundent dal l’Orient Central dad SRF.

La populaziun e quella che po mo guardar tiers e patescha il pli fitg.
Legenda: Pascal Weber: «La populaziun e quella che po mo guardar tiers e patescha il pli fitg.» Keystone

Simpel da resumar na saja il conflict en Siria insumma betg, di Pascal Weber. Per survegnir in purtret da la cumplexitad ston ins metter avant ina chasa da trais plauns.

Emprim plaun – il plaun local

Sin l’emprim plaun cumbattan il president da la Siria Baschar al-Assad encunter contrahents locals sco islamists moderats fin tar gruppaziuns sco Al Qaida ed il Stadi Islamic.

Segund plaun – il plaun regiunal

Qua cumbatta l'Iran da vart dad Assad encunter pussanzas grondas regiunalas sco l’Arabia Saudita, ils Emirats Arabs Unids, la Tirchia e l’Israel.

Terz plaun – il plaun global

Sin il plaun global èn da chattar acturs sco per exempel ils Stadis Unids u la Russia.

Il grond problem e quai che fetschia vegnir talmain cumplitgà per schliar il conflict sin via diplomatica, di Pascal Weber, saja ch'i vegnia fatg guerra sin ils singuls plauns. Ma betg be sin ils singuls plauns vegnia fatg guerra era tranter ils differents plauns. Partidas da conflict sajan da chattar en crusch ed en travers.

Co vinavant?

Cun tut quels acturs e cun tut ils interess saja grev da chattar la pasch, di Pascal Weber. Co ch'i va vinavant cun la Siria saja grev da valitar, di l’expert. Era sche Assad gudogna cun gronda probabilitad la guerra vegn il conflict anc a cuntinuar per onns. Perquai che senza agid da l’exteriur na po Baschar al-Assad betg star a la testa cun quai che l’opposiziun encunter el è fitg gronda.

Il pajais è enorm destruì, il pajais è talmain per terra. Senza enorms sforzs internaziunalas n'è quai impussibel da fabritgar si da nov il pajais. E da quel punct saja il pajais anc lunsch davent.
Autur: Pascal Webercorrespundent Orient Central SRF

Nagina pasch en vista e guerra che vegn a cuntinuar. Ed il pli intschert futur, quels che pateschan il pli fitg e na pon insumma betg sa dustar, quai saja la populaziun Siriana.

RR actualitad 07:00