Siglir tar il cuntegn
Inhalt

Exteriur Tesla cun 13avla perdita da quartal en roda

Il piunier d’autos electrics Tesla ha pudì augmentar la svieuta en il segund quartal da l'onn ma era nudà dapli sperdita. Uschia èn las entradas creschidas per in terz sin 1,27 milliardas dollars, scriva l’interpresa americana.

il schef da Tesla, Elon Musk, sorta d'in auto electric
Legenda: Elon Musk, il schef da Tesla, sto danovamain declerar in deficit. Keystone

Il medem mument noda l’interpresa in deficit da stgars 300 milliuns dollars, in augment da 60%. Quai gia il 13avel quartal en roda che l’interpresa Tesal annunzia deficits. Sco motiv principal per la perdita numna l’interpresa ils custs per l’engrondiment da la producziun.

Plan ambiziunà

Tuttina è l’interpresa optimistica da pudair furnir en la segunda mesadad da l'onn 50'000 autos. Quai fiss dapli che durant l'entir onn passà. Sch'i gartegia da cuntanscher las finamiras da producziun en la segunda mesadad da l'onn, hajan els ina buna schanza d'esser profitabel, ha ditg il schef da finanzas da Tesla, Jason Wheeler. Il schef da Tesla, Elon Musk, ha in plan ambiziunà. Entaifer 3 onns duai la producziun vegnir diesch giadas pli auta. Il 2018 vul Tesla producir 500'000 autos electrics.

RR novitads 06:00