Siglir tar il cuntegn
Inhalt

Exteriur Terrorists da Brüssel avevan atgnamain en mira Paris

Ils attentaders da Brüssel avevan tenor scuverta dals investigaders beltgs planisà in’ulteriur’attatga sin la chapitala franzosa. Ils attentaders sajan be sa decidids per Brüssel sco mira perquai ch’els n’hajan betg gì avunda temp.

La Tur d'Eiffel a Paris.
Legenda: Paris empè da Brüssel - tenor novas infurmaziuns dueva la chapitala franzosa puspè vegnir attatgada. Getty Images

Ils responsabels per las attatgas terroristicas en la chapitala da la Belgia dals 22 da mars vulevan oriundamain attatgar Paris danovamain. Quai annunzian las autoritads d’investigaziun belgias.

Ils terrorists sajan vegnids a la stretga cun lur temp, perquai ch'ils investgaders sajan stads curt avant discuvrir lur plans. Sinaquai hajan ils attentaders midà lur plans e prendì en mira Brüssel per lur attatgas.

Cumond d'arrest formal cunter «um cun chapella»

Cunter l’um arrestà il venderdi, Mohamed Abrini, èsi tenor communicaziun vegnì relaschà formalmain in cumond d’arrest. Al Beltg da 31 onns vegnan renfatschà mazzaments terroristics, mazzaments empruvads e la participaziun ad activitads d’ina gruppaziun terroristica. Abrini era vegnì identifitgà sin registraziuns da video da l’eroport sco «l’um cun chapella».

Tar ils dus attentats dals 22 da mars eran vegnidas mazzadas 38 persunas a l’eroport ed en ina staziun da metro a Brüssel. Emprimas investigaziuns avevan scuvert stretgas colliaziuns dals attentaders cun ils islamists ch’avevan mazzà il november passà 130 persunas a Paris.

RR novitads 11:00 / 12:00