Confermà:
- explosiuns a l'eroport a Brüssel ed en la metro
- almain 31 unfrendas èn confermadas.
- dapli che 230 persunas duain esser vegnir blessadas
- autoritads da segirezza supponan attatgas terroristicas e proclameschan il pli aut stgalim d'avertiment da terror
- er a l'eroport da Turitg è la preschientscha da la polizia rinforzada
- politichers da l'entir mund reageschan commuventà
Safety-check Facebook
Duas explosiuns èn stadas sin la plazza aviatica e duas en staziuns da metro en il center da la citad. La regenza ha proclamà il pli aut stgalim d'avertiment da terror. Suenter las attatgas terroristicas a Brüssel cun almain 34 morts a la regenza da la Belgia decidì ina malencurada statala da 3 dis.
La polizia belgia tschertga vinavant persunas suspectadas e gidanters. Tuttina sa normalisescha la vita en la chapitala - tunnels d'autos e lingias da viafier èn puspè avertas.
Stadi Islamic surpiglià responsabladad
Tar las explosiuns d'oz en damaun a l'eroport ed en ina staziun da la metro da Brüssel èn mortas almain 34 unfrendas tenor infurmaziuns uffizialas. Il mument quintan ins cun almain 230 blessads.
Entant ha la gruppa da terror Stadi islamic surpiglià la responsabladad per las attatgas a Brüssel. Quai annunzia l'agentura da novitads Amaq che stat datiers dal SI.
Sulet tar las explosiuns en la staziun da Metro a Brüssel Maelbeek èn tenor in rapport da l’agentura da novitads belga almain 15 persunas mortas e 55 blessadas.
L'agentura da novitads belga rapporta d'ina ulteriura explosiun en la Rue de la Loi datiers da la staziun da la metro a Maelbeek, nua ch'ina explosiun cun almain 10 morts è gia succedida oz.
La polizia ha confermà ch'i haja dà ina attatga da suicidi sin la plazza aviatica a Brüssel, Tenor rapports da medias èn pliras persunas blessadas. La polizia ha fermà il traffic a l'eroport. Medemamain èn tut ils sgols a Brüssel il mument stritgads. Il traffic public è interrut.
Sin fotografias publitgadas en l'internet era da vesair fim sur il bajetg. L'emettur Sky News a Londra ha rapportà ch'igl haja dà ina explosiun datiers dal spurtegl da la societad da sgol American Airlines.
Il plan da catastrofas saja mess en vigur, ha communitgà il primminister da la regiun da la chapitala beltga. Per la Belgia vala l'avertiment da terror sin il pli aut stgalim. Las autoritads da segirtad da la Belgia quintan che las attatgas èn acts da terror.
Suenter las attatgas terroristicas en la chapitala Brüssel ha il primminister da la Belgia Charles Michel condemnà ils acts sco «tschorv, violent e temelitg».
Els hajan temì in'attatga da terror ed i saja capità, ha ditg il primminister en ina decleranza a la televisiun. Plinavant ha el confermà che l'avertiment da privel da terror il pli aut valia per l'entir pajais.
RR novitads 09:00 / actualisà cuntinuadamain
