Siglir tar il cuntegn

Exteriur Terratrembel Myanmar: Gronds donns er tar bains culturals

En il Myanmar hai dà in ferm terratrembel. Era en ils pajais vischins èn las stremblidas stadas da sentir. Tenor las autoritads sajan almain trais persunas mortas. Er il fitg conuschent tempel da Bagan saja donnegià.

Il terratrembel è stà curt suenter las dudesch temp da l’Europa Centrala. Tenor indicaziuns da l'institut geofisic da Potsdam haja la terra stremblì cun ina fermezza da 7,0 sin la stgala da Richter e l’epicenter era en ina profunditad da 91 kilometer. Tenor las medias localas saja il terratrembel stà da sentir en ils pajais vischins Bangladesch e Tailanda.

Almain trais persunas mortas

Enfin uss han las autoritads confermà ch’ì dettia trais unfrendas. L’epicenter dal terratrembel è stà 25 km al vest da la citad Chauk en il center dal pajais. Tenor rapports da medias è era il conuschent tempel da Bagan vegnì donnegià. Quel consista da radund 3’000 construcziuns dal 9avel fin il 14avel tschientaner. Il tempel vala sco la pli impurtanta attracziun turistica dal pajais.

RR novitads 15:00