Siglir tar il cuntegn
Inhalt

Exteriur Terratrembel en Afganistan destruescha var 300 chasas

En consequenza dal ferm terratrembel en la regiun da cunfin tranter l'Afganistan il Pakistan ed il Tadschikistan èn pliras 100 chasas vegnidas destruidas. Tenor las autoritads èn sulettamain en l'Afghanistan pertutgadas bunamain 300 chasas. Plirs tozzels persunas sajan vegnidas blessadas.

A Peshawar en il Pakistan examinescha in um in mir da sia chasa suenter il terratrembel.
Legenda: A Peshawar en il Pakistan examinescha in um in mir da sia chasa suenter il terratrembel. Reuters

Il terratrembel ha gì ina fermezza da 6,3 ed è stà da sentir fin la chapitala indica New Dehli. En la medema regiun avevi pir l'october dà in terratrembel cun ina fermezza da 7,5. Lura eran radund 400 persunas vegnidas per la vita.

Salvament difficil, ma paucs morts

En la regiun enturn l’epicenter en il nord da l’Afganistan blocheschan naiv e lozza la lavur da las squadras da salvament; las vias èn inaccessiblas.

Indicaziuns davart donns u l’exact dumber d’unfrendas èn pir da spetgar en intgins dis, communitgeschan las autoritads. Il dumber d’unfrendas saja però bass, perquai ch’il terratrembel aveva cumenzà plaun; uschia hajan bleras persunas gì temp da bandunar lur chasas.

RR novitads 12:00