En l'Afganistan hai da venderdi in terratrembel posteriur dus dis suenter suenter il terratrembel desastrus cun almain 1'000 unfrendas e 1'500 persunas blessadas. Ulteriras 5 persunas èn mortas tar quest terratrembel, ha ditg ina persuna dal ministeri da sanadad.
Curt avant avevan las autoritads da l'Afganistan declerà che la tschertga da survivents en la regiun lontana e muntagnarda datiers dals cunfins cun il Pakistan saja terminada. Quai senza numnar raschuns. Tar auters terratrembels han ins gia chattà survivents cleramain pli tard che 48 uras suenter la disgrazia. En la regiun dal terratrembel sa chattan blers abitadis pitschens. Tenor in pledader dal militar èn destruidas passa 3000 chasas.
Lavurs da salvament eran difficilas
La regiun pertutgada è isolada e grev da cuntanscher. Las cundiziuns sin via sajan ussa anc mendras ch'avant il terratrembel. Tenor in pledader dal militar dals Taliban regents na saja quai betg pussaivel da cuntanscher tschertgas regiuns. Plinavant manchian maschinas per las lavurs da salvament. Blers han tschertgà las unfrendas sulettamain cun ils mauns.
Destrucizun e difficultads da salvar
In pledader dals talibans regents ha discurrì da tozzels da chasas destruidas en quatter districts pertutgads da la provinza che cunfinescha cun il Pakistan. Medias localas han rapportà ch’in vitg saja vegnì destruì cumplettamain. Las lavurs da salvament èn vegnidas engrevgiadas tras l’access a la regiun da muntogna isolada. Plirs helicopters èn vegnids tramess per gidar ils umans al lieu. In pledader da la regenza ha clamà organisaziuns d’agid per sustegn. I sajan gia gidanters da la mesa glina cotschna al lieu.
Epicenter en regiun da cunfin
La charta dals terratrembels dals Stadis Unids da l’America (SGS) ha annunzià per la stremblida da mardi curt ina fermezza da 5,9 sco er in terratrembel posteriur in pau pli debel. Tenor quel sa chattava l'epicenter dal terratrembel circa 50 kilometers en il sidvest da la citad da Chost, datiers dal cunfin cun il Pakistan, en circa 10 kilometers profunditad. Las autoritads pakistanas avevan registrà il terratrembel cun ina fermezza da 6,1.