Siglir tar il cuntegn
Inhalt

Exteriur Tensiun tranter Israel ed Iran crescha

Or da la Siria hajan truppas iranaisas laschà ir rachetas en direcziun basas militaras israelianas che sa chattan sin il Plateau dal Golan al cunfin cun la Siria. Quai annunzia l'armada israeliana. Pli u main il medem temp ha l'Israel sajettà rachetas sin miras en la Siria.

Racheta vegn sajettada.
Legenda: Al cunfin da la Siria cun l'Israel van rachetas vi e nà. Keystone
  • L'armada dal Israel annunzia la notg passada in'attatga da rachetas en direcziun da lur basa sin il Plateau dal Golan.
  • Tenor indicaziuns israelianas duain truppas iranaisas or da la Siria esser responsablas per questa attatga.
  • Intginas rachetas hajan ins pudì destruir. Infurmaziuns davart blessadas na datti betg.
  • Medias a Damascus rapportan il medem temp d'attatgas israelianas sin territori dal stadi da la Siria.

Plateau dal Golan

Personen-Box aufklappenPersonen-Box zuklappen

Il Plateau dal Golan sa chatta tranter Israel e la Siria. La gronda part dal territori è occupà dapi l'onn 1976 dal Israel. Internaziunal vegn il Plateau dal Golan renconuschì sco part da la Siria. Ina pitschna part dal territori stat dapi il 1974 sut la controlla da l'ONU. Il status dal Plateau dal Golan è in impediment per tractativas da pasch tranter ils duas pajais.

Tar attatgas ord l'aria da l'Israel en direcziun basas militaras iranaisas en la Siria èn tenor il minister da la defensiun Avigdor Lieberman bunamain l'entira infrastructura da l'Iran vegnida tutgada. Percunter na sajan naginas da las 20 rachetas sajettadas en direcziun Plateau dal Golan detunadas. Quai tenor indicaziuns da Lieberman a chaschun d'ina conferenza da pressa. Ins haja pudì destruir quatter rachetas. El speria che questa «episoda» saja ussa a fin. Els n'hajan nagin interess vid ina escalaziun.

Pli u main il medem temp rapportan medias da la Siria d'attatgas dal Israel sin miras en la Siria. Pliras rachetas duain avair tutgà miras en la provinza Quneitra en il sidvest da la Siria. Ed era aviuns da cumbat israelians duain esser stads en acziun.

Las attatgas da rachetas preoccupescha l’entir mund

Las regenzas da la Germania, da la Frantscha e da la Gronda Britannia supplitgeschan las partidas da sa tegnair enavos. Er la Russia è sa mussada preoccupada. Sco il minister da l’exteriur Sergej Lawrow ha ditg, haja la Russia appellà tant l’Iran sco er l’Israel da desister da provocaziuns. Da l'autra vart vesan ils Stadis Unis da l'America ils schabetgs sco cumprovà ch'ins na possia betg sa fidar da l'Iran.

RR novitads 06:00