Siglir tar il cuntegn

Exteriur Tendas per ils vitgs muntagnards en la regiun dal Everest

L’agid en las regiuns da catastrofa en il Nepal vegn mo plaun vinavant. La rauba d’agid cuntanscha bain la chapitala da Kathmandu. Davent da là èsi dentant grev da reparter quella rauba.

In Nepalais porta rauba d’agid en la vischinanza dal Everest.
Legenda: In Nepalais porta rauba d’agid en la vischinanza dal Everest. Keystone

Thomas Zwahlen emprova dad organisar l’agid per ils vitgs periferics davent da la Svizra anora. El ha ina fatschenta ch’organisescha viadis da trekking en il Nepal. Els possedan perquai bler material da campadi, surtut tendas. Quellas vulan els transportar cun aviuns enfin Lukla en la regiun dal Everest. Davent da là portan ils indigens lura las tendas en ils differents vitgs.