Siglir tar il cuntegn
Inhalt

Exteriur Teheran: 13 morts tar attatga da terror

La mesemna a bun’ura èn mortas almain 13 persunas tar duas attatgas da terror en la chapitala da l’Iran. Quai rapportan pliras agenturas da novitads.

Il mausoleum.
Legenda: Il mausoleum da Khomeini a Teheran sin ina fotografia che datescha dal 2005. Keystone

Ils dus attentats en la chapitala Teheran tutgan l'Iran en dus lieus simbolics – en il parlament ed en il mausoleum dal manader religius Khomeini.

In'emprima valitaziun dals attentats

  • Sche la milissa terroristica Stadi Islamic SI è vairamain l'inizianta da las attatgas, sa tractia da l'emprim attentat dals extremists sunnits en il pajais schiit. Enfin oz aveva il president iranais Rohani adina intunà, quant segir ch'il pajais saja ed uss haja l'Iran il terror amez sia chapitala, valiteschan observaturs las attatgas da la mesemna.

Las reacziuns sin l'attentat a Teheran

  • A Teheran appellescha il president iranais Rohani ad «unitad e cooperaziun internaziunala» cunter il terrorissem. Fertant ch'il president na fa betg nums, èn las autoritads religiusas e pli conservativas pli cleras en lur posiziun: Ils uschenumnads «Guardians da la revoluziun» supponan en ina communicaziun, che l'Arabia Saudita, la rivala regiunala da l'Iran, saja implitgada.
  • A New York appellescha il secretari general da l'ONU, Antonio Guterres, che «tut ils pajais han da lavurar ensemen en il cumbat cunter il terrorissem».

L'andament da las duas attatgas

  • Tenor la televisiun da stadi sajan penetrads la mesemna la bun'ura trais u quatter cumbattants en la «Chasa da la Naziun», il parlament da l'Iran, nua ch’in dad els è sa siglientà. Las agenturas rapportan da scenas dramaticas cun sajettim ed ostagis en il parlament, che duravan pliras uras.
  • Al medem mument eran ils 290 deputads dal pajais en il parlament. En la rait cursava ina sequenza da video che mussava il president dal parlament Ali Laridschani, che sa mussava tschert, che las attatgas sajan «ina chaussa laterala» e che las forzas da segirezza hajan tut sut controlla.
  • Dus auters cumbattants sajan sa siglientads tar il mausoleum da l’anteriur manader religius Khomeini en il sid da la citad.

13 persunas moran, sis da set attatgaders èn er morts

  • Actualmain vegn rapportà tenor las forzas da salvament da 13 persunas mortas e passa 50 persunas blessadas. Las autoritads rapportan, che sis da set attatgaders sajan er morts. In saja en fermanza.

SI sa declera responsabel

  • La milissa da terror Stadi Islamic SI ha declerà dad esser responsabla per las attatgas tar il parlament ed il mausoleum da Khomeini. Quai annunzia il SI via ses chanal da propaganda Amaq.
  • Il SI aveva smanatschà repetidamain cun attatgas en l’Iran. Il mars aveva la gruppa d’extremists sunnita SI annunzià en in video da vulair conquistar l’Iran schiit per sia «naziun sunnita». Er suenter las attatgas la mesemna ha il SI smanatschà da far ulteriurs attentats.

Attentats a Teheran èn fitg rars

  • Tals attentats sajan excepziunals a Teheran, scrivan las agenturas da novitads. Ils ultims sajan stads en ils onns suenter la revoluziun islamica il 1979. Quels attentats vegnan attribuids a l’organisaziun armada dals uschenumnads «Mudschaheddins dal pievel».

RR novitads 09:00++