Siglir tar il cuntegn
Inhalt

Exteriur Ted Cruz gudogna per ils republicans a Wisconsin

Tar las preelecziuns per il presidi american en il stadi federativ Wisconsin han ils favurits tratg la curta. Ted Cruz ha gudagnà tar ils Republicans e Bernie Sanders tar ils Democrats, quai rapportan plirs emetturs da televisiun.

Ted Cruz sa legra da sia victoria.
Legenda: Ted Cruz, il senatur da Texas procura per ina terrada per Donald Trump. Keystone

Suenter che bun la mesadad da las vusch èn dumbradas maina Cruz cun radund 52%, quai cun 20% avant ses concurrent Donald Trump. Sanders ha medemamain gudagnà cleramain avant Hillary Clinton, quai cun radund 54 tar 46%.

Clinton e Trump mainan dentant vinavant

Vesì sur l'entira campagna ora è dentant anc adina Hillary Clinton a la testa tar ils democrats, quai cun 1'743 vuschs da delegads. Per la nominaziun dovra quai 2'383 vuschs. Bernie Sanders vegn il mument sin 1'056.

Donald Trump maina tar ils republicans cun 740 vuschs da delegads. Il milliardari Trump è però fitg dispitaivel, perfin tranter ils Republicans sezs. Blers vulan impedir el sco candidat perquai ch'els teman ch’i dess cun Trump ina clera terrada da las elecziuns per propi il november che vegn cunter ils democrats. Ted Cruz è sin plazza dus cun 514 vuschs.

RR novitads 06:00