Siglir tar il cuntegn
Inhalt

Exteriur Team da medis svizzer duai gidar en il Nepal

La Svizra ha tramess in team da 10 medis en la regiun da terratrembel en il Nepal. Quels duain surtut gidar tar operaziuns chirurgicas.

Persunas ascendan in aviun da la Rega
Legenda: Gia avant in per dis aveva la Svizra tramess 6 persunas per gidar en il Nepal. Keystone

Per damaun saja ultra da quai planisà da trametter ina furniziun pli gronda cun rauba d'agid, scriva il Departament federal d'affars exteriurs. Cun questa furniziun duain otg ulteriurs spezialists arrivar en il lieu da catastrofa.

100 milliuns dollars per il Nepal

Il mument dat i pli e pli bleras empermischuns d'agid per il Nepal. Il Program alimentar mundial da l'ONU vul tranter auter impunder passa 100 milliuns dollars en il Nepal. Ed er ils Stadis Unids e l'Australia augmentan lur agid.

Nepal na vul betg tut ils gidanters

Il schef dal management da catastrofas dal Nepal, Ram Kumar Dahal, na vul betg pli laschar vegnir mintga agid en il pajais. Il mument sajan radund 22 enfin 24 truppas da salvament internaziunalas en il Nepal. Dapli na dovri betg tenor Dahal. Sch'ins engaschi quels en il dretg lieu stuessi quai tanscher ha el ditg. Mintgin che vegni en il pajais stoppia ultra da quai avair in plan. Il port aviatic saja surchargià.

RR novitads 07:00