Siglir tar il cuntegn
Inhalt

Exteriur Tancs tircs entran en Siria

Tancs dal militar tirc èn s’avanzads en Siria datiers da la citad Dscharablus. L’offensiva è ina acziun cuminaivla da la Tirchia e da la coaliziun militara manada dals Stadis Unids.

Ils tancs dal militar tirc en Siria.
Legenda: Ils tancs dal militar tirc en Siria. Keystone

La finamira è da stgatschar la milissa da terror stadi islamic davent dal cunfin da la Tirchia. Sco la televisiun statala tirca rapporta sajan ils tancs s’avanzads a la citad da Dscharablus che vala sco center da la milissa da terror stadi islamic. L’offensiva communabla da la Tirchia e la coaliziun militara manada dals Stadis Unids ha cumenzà gia la notg. Uschia han aviuns americans e tircs attatgà posiziuns dal SI.

Tirchia ha er en mira ils curds

Era ina part da la strategia è d’evitar che cumbattants curds reconquistan la regiun. Uschia han els annunzià d’avair reconquistà la citad da Hasaka en l’ost da la Siria. Uschia controlleschan ils curds gia grondas parts dal nord da la Siria. La regenza tirca persequitescha cun suspect ils success militars dals curds perquai ch’ella tema uschia in creschament da la partida da lavurants curda (PKK) en l’agen pajais. Uschia vul la Tirchia evitar che la regiun da Dscharablus vegnia en ils mauns dals cumbattants curds.

RR novitads 11:00