En il nord dal Vietnam èn almain 11 persunas mortas pervi dad inundaziuns suenter in taifun. Ulteriuras 8 persunas èn blessadas, ha communitgà il comité da l'agid d'urgenza dal Vietnam. Il taifun«Dianmu» haja donnegià bunamain 2'000 chasas e 11'000 hectaras champs da ris.
Era las autoritads giapunaisas averteschan dad in taifun. «Mindulle» è il novavel taifun da l'onn e las autoritads quintan cun undas autas e bovas. Tenor las prognosas duai el cuntanscher glindesdi suentermezdi la chapitala Tokio. Passa 400 sgols e 100 trens èn vegnids stritgads pervi da fermas plievgias e vents.
