Siglir tar il cuntegn

Exteriur Taglias ensi – rentas engiu

La Grezia ha decis novas mesiras da spargn che duain purtar quatter milliardas euros. L'opposiziun ed il pievel fan protesta.

Politichers grecs.
Legenda: Il primminister Alexis Tsipras persequitescha la debatta en il parlament grec. Keystone
  • Il parlament grec ha approvà in nov program da spargn da bunamain tschintg milliardas euros.
  • Quest program prevesa ulteriuras reducziuns da rentas e auzaments da taglia.
  • La Grezia dovra fin il fanadur puspè daners da ses partenaris europeics.
  • Il pajais sto lura pajar enavos credits da set milliardas euros.

Tut ils 153 parlamentaris da la coaliziun da regenza dal primminister Alexis Tsipras èn stads per il program da spargn. 128 parlamentaris han vuschà encunter quel. Grazia a questas novas mesiras da spargn spera la regenza sin entradas da passa quatter milliardas euros. Questas mesiras èn premissa per ch'il pajais survegn vinavant agid finanzial da ses crediturs internaziunals.

L'opposiziun renfatscha a Tsipras d'avair pers memia bler temp als discurs cun inls crediturs. Mo perquai dovria uss questas ulteriuras mesiras da spargn per insacura puspè star sin atgnas chommas.

Protests e chaumas

Cunter il program da spargn avevan millis da Grecs protestà mesemna cun ina chauma generala. Tenor l'uniun dals pensiunads grecs sa tracti gia da la 15avla reducziun da rentas dapi il 2010.

Mesemna saira han radund 3'000 persunas protestà davant il parlament ad Athen. I ha dà charplinas tranter ils demonstrants e la polizia.

Ils mariners da la navigaziun da costa han cuntinuà lur chauma il terz di en roda. En consequenza èn bleras inslas senza plazza aviatica isoladas. La chauma duaja cuzzar fin sonda.

RR novitads 06:00