Siglir tar il cuntegn

Header

Navigaziun

maridar
Legenda: En il focus principal è il tema «lètg e famiglia» en il temp dad oz. Keystone
cuntegn

Exteriur Tabus e temas brisants

Dumengia cumenza la segunda sinoda dals uvestgs che papa Francestg ha clamà ensemen. Durant 3 emnas discurran uvestgs, experts ed era autras persunas davart divers temas. En il focus principal è il tema «lètg e famiglia» en il temp dad oz. Magari in tema da tabu e tut tenor era brisant.

Gia avant in onn ha papa Francestg envidà ad ina sinoda extraordinaria. Lura han radund 200 persunas or da l'entir mund discutà davart lètg e sexualitad. Quai ha valì sco preparaziun per la segunda sinoda che va fin la fin dal mais. Il pontifex spetga schliaziuns concretas. Quai na vegn betg ad esser uschè simpel cunquai che las opiniuns entaifer la baselgia catolica davart lètg, sexualitad e famiglia van lunsch dapart. La teologa Eva Maria Faber spera ch'ins saja tuttina avert per discurs.

Co tractar persunas divorziadas e puspè maridadas

In dals temas principals vegn ad esser la lètg, il sacrament da la lètg e co ch’ins va enturn cun persunas divorziadas che maridan puspè. Tenor la norma da la baselgia è ina lètg in contract, ina colliaziun che Dieus ha fatg tranter um e dunna. Tenor la norma tutga il pèr ensemen, fundescha ina famiglia e viva tenor las valurs cristifidaivlas fin la mort.

Ozendi cun bleras separaziuns dettia quai ina gronda discrepanza, manegia Faber, e quai sajan dumondas che la Baselgia na possia betg guntgir. La lètg u il maletg da la lètg saja actualmain insatge smanatschant, la ristga che la lètg fetschia naufragi saja gronda e tementia era la giuventetgna, di Eva Maria Faber.

Vista da l'uffant

Savend da quella situaziun saja il papa interessà che la baselgia sa muventia e chattia ina moda e maniera co ir enturn cun quai. Tenor Eva Maria Faber guardia il papa tar il tema famiglia fermamain ord la vista da l'uffant. El sa dumondia sch'i dastgia esser ch'in uffant, che na s'empo da nagut, creschia si en ina situaziun ch'è tenor la baselgia irregulara.

Opiniuns gia fatgas

Faber relativescha dentant era las speranzas che la sinoda vegnia cun schliaziuns concretas en quella chaussa. Las opiniuns sajan per gronda part gia fatgas. Gia tar l'emprima sinoda avant in onn, n’han ils participants chattà nagin consens en las dumondas dispitaivlas.