Syngenta fa en ils Stadis Unids affars davent da differents lieus. Il concern fa bunamain in quart da sia svieuta en l’America dal Nord. Là è el il pli grond vendider da pesticids ed ha ina rolla impurtanta sin il martgà da semenza.
Las autoritads vegnan a far part dal gremi american che controlleschia ils aspects da segirtad per ils Stadis Unids, rapporta l’agentura da novitads reuters. Finamira saja d'examinar las consequenzas da la transacziun da 43 milliardas dollars sin la segirtad dal provediment d’aliments per ils Stadis Unids.
I vul il consentiment da plirs gremis
Per la pli gronda cumpra d’ina interpresa chinaisa en l’exteriur ston uss plirs gremis da cartel dar lur consentiment. Decisiva saja tenor experts la posiziun da la cumissiun americana per investiziuns da l’exteriur en ils Stadis Unids (CFIUS). En quella èn tranter auters ils ministeris per finanzas, protecziun da la patria e defaisa. Normalmain n`è il ministeri d’agricultura betg da la partida.
Nagina posiziun dals pertutgads
Il ministeri d’agricultura e Syngenta na prendan betg posiziun en chaussa. Da ChemChina na datti tenor l’agentura da novitads reuters betg anc ina posiziun.
ChemChina ha entant prolungà il termin per inoltrar offertas per las aczias da Syngenta dal 23 da matg enfin ils 18 da fanadur. Vi da las cundiziuns da l’offerta na sa midia dentant nagut, ha ditg ChemChina.
RR novitads 08:00