Siglir tar il cuntegn
Inhalt

Exteriur Svizra resta sin glista d'observaziun americana

Ensemen cun ils pajais China, Germania, Corea e Giapun resta la Svizra vinavant sin la glista d'observaziun per manipulaziun monetara dals Stadis Unids.

La Banca naziunala svizra sin la Plazza federala a Berna.
Legenda: La Banca naziunala svizra sin la Plazza federala a Berna. Keystone

Gia la primavaira aveva il ministeri da finanzas da l'USA crititgà las intervenziuns da la Banca naziunala Svizra per diminuir la valur dal franc svizzer. Era en il rapport actual dal ministeri da finanzas dals Stadis Unids resta la Svizra sin la glista d'observaziun americana per manipulaziun monetara.

Pervi da lur gronds surplìs commerzials cun ils Stadis Unids vegnan 4 ulteriuras naziuns observadas spezialmain da l'administraziun Trump. Igl èn quai la China, la Germania, il Giapun e la Corea dal Sid. Sco i resorta dal rapport dal ministeri da finanzas american, n'adempleschan dentant nagins da quests pajais actualmain ils criteris per valair sco manipulatur monetar.

En il rapport actual è Taiwan vegnì stritgà da la glista d'observaziun. Il pajais haja sminuì dapi la primavaira las intervenziuns sin ils martgads da devisas.

Il ministeri da finanzas da l'USA elavurescha mintgamai l'avrigl e l'october in rapport. En quel vegn analisà, sch'in pajais manipulescha sia valuta per uschia cuntanscher avantatgs da commerzi envers ils Stadis Unids. Sch'il rapport mussa cumprovas per ina manipulaziun d'ina valuta, lura sto la regenza americana reagir.

RR novitads 06:00