Siglir tar il cuntegn

Header

cuntegn

Exteriur Svizra è pronta d'intermediar en il conflict da la Corea dal Nord

I saja uss nairas uras da sa metter vid ina maisa, ha ditg Doris Leuthard ad ina conferenza da medias a Berna.

audio
La Svizra duai intermediar en il conflict cun la Corea dal Nord
ord Actualitad dals 04.09.2017.
laschar ir. Durada: 53 Secundas.

La China ed ils Stadis Unids stoppian surpigliar lur responsabladad. I saja uss propi nairas uras da sa metter vid ina maisa, ha ditg Leuthard ad ina conferenza da medias a Berna.

Al cunfin tranter la Corea dal Nord e la Corea dal Sid èn staziunadas dapi passa 60 onns truppas svizras - tranter auter per survegliar l'armistizi tranter ils dus pajais.

Reacziuns vehementas suenter test nuclear

D'ina vart smanatschan ils Stadis Unids cun ina resposta militara massiva, en cas d’in privel davart da la Corea dal Nord e da l'autra vart ha la Corea dal Sid reagì cun in exercizi da rachetas.

L’armada sidcoreana haja simulà in’attatga sin l’areal atomar dal vischin. Quai ha communitgà l’armada sidcoreana. La Corea dal Sid vesa indizis che la Corea dal Nord planiseschia ulteriurs tests da rachetas. Quai han ditg experts da defensiun avant il parlament a Seoul.

Ins haja infurmaziuns ch'inditgeschian ch'il vischin veglia lantschar in'ulteriura racheta intercontinentala. Dumengia aveva la Corea dal Nord testà tenor atgnas indicaziuns ina bumba idrogenica.

Smanatscha americana

Il minister da defensiun american, James Mattis ha declerà sinaquai che scadina periclitaziun dals Stadis Unids u da ses alliads, haja per consequenza ina resposta militara massiva.

Il glindesdi sa raduna perquai il Cussegl da segirezza da l’ONU a New York per discutar davart ulteriuras mesiras cunter il reschim a Pjöngjang.

RR novitads 10:00+

Artitgels legids il pli savens