La Germania ha mess la Svizra sin la glista dals pajais ad aut ristg. Quai perquai che las cifras d’infecziuns cun il coronavirus sajan autas qua, han communitgà las autoritads responsablas. A partir da la dumengia vala: tgi che n’è betg cumplettamain vaccinà u guarì da Covid-19 e vul ir da la Svizra en Germania sto ir per 10 dis en quarantina. In test negativ suenter tschintg dis terminescha la quarantina. Uffants fin 12 ston era ir per tschintg dis en quarantina.
Era la Pologna, il Liechtenstein, Jordania e Mauritius èn da nov sin la glista dals pajas ad aut ristg.
Turissem svizzer è consternà
Per l'organisaziun dals hotels svizzers, Hotelleriesuisse, saja questa decisiun desastrusa. Blers hosps na vegnian betg a vegnir pervi da la quarantina per persunas betg vaccinadas. Era la nova regla, che mintgin stoppia avair in test da PCR negativ avant ch'entrar en la Svizra ed in test supplementar in per dis suenter, valetescha la pledadra da l'organisaziun negativ.
La quota da vaccinaziuns en Germania saja uschè auta ch'avunda giasts possian entrar senza problems, di André Aschwanden, pledader da Svizra Turissem.
Quai fiss anc adina bler meglier che l'enviern passà senza giasts da l'exteriur.
