Siglir tar il cuntegn
cuntegn

Exteriur Suspect da corrupziun en Cussegl d'Europa

En il Cussegl d’Europa paran plirs delegads d’avair retschavì daners da corrupziun da l’Aserbaidschan.

Purtret da la stanza da sedutas.
Legenda: La stanza da seduta dal Cussegl d'Europa a Brüssel. Reuters
  • Investigaders externs vesan fermas indicaziuns ch'i haja dà corrupziun tar plirs commembers activs ed anteriurs dal Cussegl d'Europa.
  • Ina gruppa entaifer l'organisaziun haja lavurà per l'Aserbaidschan, hai num en il rapport da la cumissiun.
  • Sco reacziun èn culads daners dal pajais autoritar.

Els duain en sasez cuntrafar a la corrupziun – ussa vegn renfatschà ad intgins commembers dal Cussegl d'Europa d'esser corrupts. Deputads da la radunanza parlamentara sajan vegnids influenzads cun daners da l'Aserbaidschan.

Daners sajan culads

Investigaders externs vesan ferms indizis da corrupziun tar commembers activs ed anteriurs da la radunanza parlamentara dal Cussegl d'Europa. Uschia haja ina gruppa da l'organisaziun lavurà per l'Aserbaidschan, hai num en il rapport da la cumissiun che ha investigà. Sco reacziun sajan culads daners dal pajais.

En il focus da las investigaziun stat era la deputada dal parlament dal bundestag, Karin Strenz. Ad ella vegn renfatschà en il rapport d'esser sa cuntegnida fauss.

Cussegl d'Europa

Pensum dal Cussegl d'Europa è tranter auter da controllar ch'ils dretgs umans vegnan resguardads en ils 47 pajais commembers. A l'organisaziun cun sedia a Strasbourg appartegnan tut ils stadis da l'Uniun Europeica, dentant era pajais sco la Tirchia, la Russia, la Svizra u l'Aserbaidschan.

Suspect è vegnì adina pli grond

La radunanza parlamentara cun represchentants dals pajais commembers sa raduna pliras giadas ad onn e po per exempel trametter observaders per elecziuns en ils pajais commembers.

Durant ils ultims onns è l'a radunanza vegnida suspectada adina pli fitg d'esser corrupta. En rapports da medias è vegnì rapportà en connex cun relaziun tar l'Aserbaischan d'ina «diplomazia da caviar». Per sclerir l'affera han ins fundà la cumissiun d'inquisiziun, che ha ussa preschentà ses rapport.

Divers nums en il rapport

Il rapport da 200 paginas cuntegna divers nums da persunas, tranter auter er la dunna da la CDU, Strenz. Ella n'appartegna betg pli a la radunanza. Ad ella vegn renfatschà da betg avair fatg transparent conflicts d'interess avant ch'ella ha fatg part ad ina cumissiun d'observar las elecziuns en l'Aserbaidschan. Strenz haja acceptà daners dal pajais sur sviadas. Durant ses temp a Strasbourg saja ella adina puspè crudada en egl sco sustegnidra da l'Aserbaidschan.

La cumissiun da trais anteriurs derschaders ha scrit en il rapport che la politicra Tudestga na saja betg cumparida ad ina interrogaziun. Ina giada saja ella stada malsauna, suenter haja ella gì da far memia bler cun ses pensums en il bundestag e n'haja gì nagin temp.

Renfatschas er cunter ex-president

Las renfatschas dal rapport tanschan enfin en ils pli auts rangs. Er l'anteriur president, Pedro Agramunt vegn suspectà. I dettia ferms indizis ch'el saja stà part da acziuns corruptas.

Agramunt era sa retratg l'october sco president. Suenter avair vis el ensemen cun Baschar al-Assad è il privel per el da betg pli vegnir reelegì stà grond.

RR novitads 06:00