Siglir tar il cuntegn
Inhalt

Exteriur Supreme Court: Trump nominescha candidat conservativ

Neil Gorsuch duai succeder al derschader barmier Antonin Scalia.

Politiches americans.
Legenda: Donald Trump e ses candidat giavischà per il post sco derschader al tribunal suprem: il conservativ Neil Gorsuch. Keystone

Gorsuch ha 49 onns e vala sco adversari vehement da l'abort e sco defensur da la paina da mort – sumegliant a ses antecessur Antonin Scalia ch'è mort avant in onn en la vegliadetgna da 79 onns.

Per vegnir elegì dovra Gorsuch dentant il consentiment da 60 dals 100 senaturs. Cunquai ch'ils republicans han dentant be 52 senaturs vegnì fatg quint cun ina cuntraversa pli lunga.

Obama aveva er nominà in candidat

Il president da lez temp Barack Obama aveva nominà ses candidat per il post vacant al Supreme Court, il tribunal suprem dals Stadis Unids. Tenor la veglia dad Obama avess il giurist Merrick Garland duì succeder al derschader federal barmier Antonin Scalia. Garland vala sco moderà. Dentant han ils republicans betg dà lur consentiment al candidat da Barack Obama.

Post da grond'influenza

Il Supreme Court ha ina grond’influenza sin il clima social en ils Stadis Unids. Da patratgar èsi cunzunt a temas dispitaivels sco abort ed armas, egualitad ed immigraziun. Ils derschaders al Supreme Court vegnan elegids per vita duranta.

RR novitads 06:00