Siglir tar il cuntegn
Inhalt

Exteriur «Super Tuesday» - gudagnar vuschs

A nagins auters dis en il cumbat electoral per la candidatura da president dals Stadis Unids po vegnir gudagnà uschè bleras vuschs da delegads sco oz. Ils favurits al «Super Tuesday» èn la democrata Hillary Clinton ed il republican Donald Trump.

Tatgaders per las elecziuns.
Legenda: "Super Tuesday" - il di dals dis en il Stadis Unids. Keystone

Elecziuns primaras en 12 stadis federativs ed uschia gudagnar ina quarta da tut las vuschs da delegads: Il «Super Tuesday» è per ils candidats per il post da president en ils Stadis Unids in di da grond cumbat.

«Nus vegnin ad avair ina buna notg a Texas ed ils auters stadis», manegia cun plain fidanza il candidat republican Ted Cruz. El maina tenor las retschertgas en sia patria Texas. Ina terrada a Texas fiss ina schleppa.

Donald Trump
Legenda: Donald Trump, il favurit tar ils republicans. Reuters

Trump provochescha

En ils auters stadis ha Donald Trump il nas davanttiers tar ils republicans. Il mogul d’immobiglias provocheschan anc dapli che uschiglio. Uschia ha el tar in’occurrenza sprizzà aua ord ina buttiglia en il publicum e clamà latiers: «Quai è Rubio!» Il concurrent Marco Rubio sua savens fitg ferm en la publicitad.

Il pertutgà ha reagì sin in sumegliant nivel: Trump na betg suà, perquai che ses spray per vegnir brins haja stuppà las poras, ha ditg Rubio.

Hillary Clinton
Legenda: Hillary Clinton, la favurita tar ils democrats. Reuters

«Grondiusa America»

Tar ils democrats vesa Hillary Clinton sa sezza gia sco victura. Il concurrent Bernie Sanders na menziunescha gnanc pli Clinton. «America saja gia oz grondiusa!», ha ella clamà en il public durant in’occurrenza, quai sa basond sin il slogan da candidatura da Turmp «Make America Great Again». Sanders accentuescha entant ch’el na studegia insumma betg da terminar cun il cumbat electoral.

Economia in dals puncts centrals

L’economia americana è in impurtant tema en il cumbat electoral per il presidi dals Stadis Unids. Ils candidats prendan serius la chaussa, dentant betg cun vardad.

Dapi che Barack Obama è vegnì elegì sco president american il 2008 è la quota da dischoccupaziun sa reducida per bun la mesadad. La dischoccupaziun mussa ensi, il svilup constat – la pli gronda economia publica dal mund pudess giubilar. Ma per la populaziun americana è l’economia ina da las grondas temas ed uschia in tema central en il cumbat electoral.

Cura che las vuschs dal «Super Tuesday» èn dumbradas, n’è la decisiun interna tar las partidas anc betg decidida. I è dentant da quintar, che Hillary Clinton e Donald Trump nizzegian quest di da sa distanziar anc pli fitg da la concurrenza.

Ina Rumantscha che d'astga eleger en ils Stadis Unids

Dapi il 1983 viva Anita Turner en ils Stadis Unids da l’America – elegì ha ella fin ussa dentant anc mai. Cun buna raschun, ella na dastgava betg. Dapi l’onn passà è ella dentant burgaisa dals Stadis Unids e po perquai eleger quai onn per l’emprima giada il nov president – u la nova presidenta.

Anita Turner stat ad Austin, Texas. Texas, in stadi en il sid da l’America che vala sco conservativ e cunzunt republican. Austin, la chapitala vala tenor Anita Turner dentant sco democratic, ella sezza elegi en las pre-elecziuns al “Super-Tuesday” il republican Marco Rubio.

Hillary Clinton u Donald Trump

Quai saja schon ina gronda ed impurtanta chaussa per ella, da pudair eleger per l’emprima giada. Dentant er sch’ella elegia Marco Rubio, crai ella plitost, sch’ella stuess metter daners, che Donald Trump daventa il candidat per ils republicans. Hillary Clinton daventa candidata per ils democrats, da quai è Anita Turner persvasa. Ma sche'ella è republicana, lura stuvess ella gea er eleger Donald Trump cu i è uschè lunsch, ni? Na, gliez na fetschia ella betg. Ella na vul bain ni Hillary Clinton ni Donald Trump, ma en il cas dils cas sa decidess ella probabel per Hillary Clinton. Tenor Anita Turner fissi numnadamain donn da betg ir ad eleger l’emprima giada ch’ins pudess.