Suenter las attatgas da Barcelona e Cambrils

Suenter las attatgas da la gievgia en la Spagna è la regenza spagnola persvadida che la cella ch'ha fatg il terror saja destruida.
Pli precautas èn la polizia e la regenza catalana.

Il minister da l'intern da la Spagna, Juan Ignacio Zoido.

Legenda da maletgs: Il minister da l'intern da la Spagna, Juan Ignacio Zoido. Keystone

Suenter las attatgas da gievgia a Barcelona e conturns va la regenza da la Spagna ora da quai, che la cella da terror saja destruida. Quai ha ditg il minister da l’intern Juan Ignacio Zoido la sonda avant las medias.

Las retschertgas enfin ussa mussan, ch’ina cella da terror d’almain nov extremists ha planisà las attatgas da Barcelona e Cambrils. En tut èn mortas 14 persunas tar quellas attatgas. Ils tschintg suspectads che la polizia ha sajettà giu èn identifitgads. Quatter persunas èn vegnidas arrestadas.

La polizia tschertga anc persunas

Actualmain tschertga la polizia anc in marocan da 22 onns, quai ha declerà il pledader da la polizia catalana. Tenor medias spagnolas saja el il chau da la cella da terror ed haja manischà l’auto da furniziun a Barcelona.

La polizia e la regenza catalana giuditgeschan il stan da las retschertgas pli precaut: Duas fin trais persunas vegnian anc tschertgadas en connex cun las attatgas, ha ditg il minister da l'intern catalan, Joaquim Forn. Entant che quai saja il cas, na possian ins anc betg dir, che la cella da terror saja destruida.

Anc 12 persunas en in stadi critic

Entant sa chattan anc 54 persunas en l'ospital, suenter las attatgas a Barcelona ed a Cambrils. 12 pazients sajan en in stadi critic ed ulteriuras 25 persunas sajan grevamain blessadas, quai annunzian ils servetschs d'urgenza. En tut èn passa 100 persunas vegnidas blessadas, cura ch'in transporter è charrà la gievgia en ina fulla da persunas sin il boulevard Las Ramblas.

RR novitads 16:00