Siglir tar il cuntegn

Header

cuntegn

Exteriur Suenter il terratrembel: 3 uffants salvads sin l'insla Ischia (I)

Trais uffants ch'eran vegnids traplads tras il terratrembel sin l'insla Ischia en ina ruina èn salvads, rapportan ils pumpiers en il Sid da l'Italia. Fin uss èn vegnidas chattadas duas unfrendas dal terratrembel en il Golf da Napoli, han rapportà las autoritads.

Tenor las autoritads sajan almain anc set persunas sparidas ed almain 39 sajan blessadas. Duas dunnas èn vegnidas chattadas mortas. In uffants da set mais è anc vegnì salvà la notg. Cun ses dus frars dad 8 ed 11 onns avevan las equipas da salvament pudì stabilir anc la bun'ura in contact:

Nus udin lur vuschs e nus discurrin cun els per als quietar.
Autur: Luca Cari Pledader dals pumpiers

En il decurs dal di han ils mats pudì vegnir salvads or da las ruinas da lur atgna chasa.

Surtut pertutgada dal terratrembel è la localitad da Casamicciola en il nord da l’insla. Plirs edifizis èn là sballunads. L’ospital da l’insla ha per part stuì vegnir evacuà. Tenor la surveglianza da terratrembels taliana ha il terratrembel ad Ischia, en il golf da Napoli, gì ina fermezza da 4,0.

RR novitads 06:00+

Artitgels legids il pli savens