Il president talian Sergio Mattarella refusa la demissiun dal primminister Mario Draghi. Mattarella ha ordinà Draghi da rapportar al parlament e da valitar la situaziun hai num en ina communicaziun da gievgia.
Curt avant aveva il primminister Mario Draghi annunzià ch'el veglia sa retrair en consequenza da la crisa da regenza en Italia. Ses plan da demissiunar ha el annunzià la gievgia saira ad ina sesida dal cussegl da ministers e da ministras, sco ses sez uffizial ha annunzià.
Jau vi annunziar a vus, ch'jau vegn ad inoltrar anc questa saira mia demissiun al president da la republica.
Paucas uras avant aveva el anc surmuntà ina votaziun da fidanza en il senat. Tar la votaziun en la chombra pitschna gieva quai per las consequenzas da la guerra en l'Ucraina e co mitigiar quellas per las chasadas ed interpresas. Tar il pachet d'agid n'era il Movimento Cinque Stelle betg perina ed è perquai s’abstegnì. Tuttina ha la regenza gudagnà cun gronda maioritad il votum da disfidanza. La crisa da regenza n'era cunquai però betg giud maisa.