Siglir tar il cuntegn
cuntegn

Exteriur Success tar discurs da coaliziun en Germania

Las testas da la partidas e fracziuns da CDU, CSU e SPD hajan fatg in pass enavant tar lur discurs da sondagi davart ina cuntinuaziun da la coaliziun gronda. Quai rapportan las agenturas da novitads. Las gruppas da sondagi da tuttas partidas èn gia d'accord cun il document communabel.

Centrala da la SPD durant la notg.
Legenda: En la centrala da la SPD è vegnì discutà l'entira notg. Reuters

Ils trais parsuras – Angela Merkel (CDU), Horst Seehofer (CSU) e cunzunt er Martin Schulz (SPD) – vulan proponer a lur partidas da manar uffizialmain tractativas da coaliziun.Las gruppas da sondagi da tuttas partidas èn gia d'accord cun il document communabel. Uss sto be anc la basa da la SPD dir gea a quel l'emna proxima ad in di da partida extraordinari. Lura è la via libra per ir en las contractivas per ina nova coaliziun gronda.

En plirs puncts n'hai ditg betg dà in cumpromiss. Quai cunzunt areguard la politica da fugitivs, da las finanzas, dal martgà da lavur, da las rentas e da la sanadad. En ils ultims discurs èn las partidas tranter auter sa cunvegnidas da betg auzar la taglia, limitar il dumber d'immigrants sin 180'000 fin 220'000 e sustegnair anc pli fitg, er finanzialmain l'uniun europeica.

Spassegiada da notg

Durant la notg sin il venderdi èn plirs politichers ids a spass enturn il bajetg. La vicepresidenta da la CDU Ursula von der Leyen, Julia Klöckner sco era la politicra da la CSU Dorothee Bär han bandunà temporarmain la centrala da la SPD. Il vice da la SPD Stegner, minister da l'intern Thomas de Maizière ed il primminister dal Hessen Volker Bouffier (CDU) han entant dà scat. Durant quest temp han ils politichers adina puspè clamà natiers experts per chattar ina schliaziun, dentant adumbatten.

Il november passà avevan ils discurs da sondagi per ina coaliziun da Giamaica tranter la CDU/CSU, la FDP ed ils Verds surprendentamain fatg naufragi.

RR novitads 06:00+