Siglir tar il cuntegn
cuntegn

Exteriur Success a Vienna – I dat ina cunvegna en ils discurs d’atom

En las tractativas d'atom cun l'Iran datti ina cunvegna. Suenter diplomats iranais ed ils circuls dal vest ha era l'UE confermà ch'i haja dà ina schliaziun a Vienna.

Ils represchentants da las pussanzas da veto da l'ONU, la Germania e l'Iran.
Legenda: Tar ils discurs mava quai probabel per las ultimas formulaziuns da la cunvegna. Keystone

L'incumbensada da l'UE, Federica Mogherini, ha confermà ch'i haja dà ina cunvegna en la dispita d'atom cun l'Iran.

In segn da speranza mundial

Quai saja in segn da speranza per l'entir mund, uschia Mogherini, curt avant che l'Iran e l'Agentura internaziunala da l'energia nucleara han suttascrit la cunvegna. Questa cunvegna duai segirar che l'Iran na construeschia naginas armas atomaras.

Sco cuntramesira duain las sancziuns e l'embargo dad armas cunter l'Iran crudar.

Reacziuns: Iran, UE, Svizra, ONU

  • Il minister da l'exteriur iranais Dschawad Sharif ha discurrì d'in mument istoric.
  • L'incumbensada da l'UE, Federica Mogherini, ha declerà che la cunvegna avria in nov chapitel en las relaziuns internaziunalas.
  • En Svizra ha il Departament da l'exteriur beneventà la cunvegna sco success da la diplomazia.
  • Il secretari general da l'ONU, Ban Ki Moon, ha discurrì d'ina conferma dal niz dal dialog. El speria che la cunvegna possia procurar per pasch e segirtad en la regiun e surora.

RR novitads 08:30 / 11:30 / 14:00