- En ina via da butias a Stockholm saja in vehichel charrà en ina fulla da persunas.
- La polizia svedaisa conferma almain 4 persunas mortas e 15 blessadas.
- Il primminister svedais Stefan Löfven ed il servetsch secret svedais sminan in «attentat terroristic»
- Entant segirescha era il vischin Norvegia las citads grondas e la plazza aviatica ad Oslo.
- Tenor la polizia svedaisa saja l'um arrestà venderdi saira vegni arrestà sco delinquent supponì, pia sco manischunz supponì dal camiun.
- Ina segunda persuna è vegnida arrestada. I n'è dentant betg cler sche quella ha in connex cun l'attatga e sche ulteriuras persunas èn involvidas.
Il venderdì è in pitschen camiun charrà en il center da la citad sin ina via da butias. Tar la cruschada Drottninggatan e Kungsgatan saja il camiun charrà en la fulla curt avant las 15:00. Lura haja el continuà e saja charrà en il negozi grond Åhléns. Quest quartier vala sco center per turists.
La regenza svedaisa discurra d'in attentat terroristic. «La Svezia è vegnida attatgada. Tut ils indizis mussan sin in act terroristic», ha ditg il primminister Stefan Löfven a la televisiun svedaisa.
Il stan actual da las inquisiziuns - pli segir in act da terror
Sonda suentermezdi ha la polizia svedaisa infurmà davart il stan da las inquisiziuns. Il schef da la polizia Dan Eliasson ha ditg ch'i na dettia nagins indizis che la polizia avess arrestà il fallà. Plinavant ha el ditg ch'ins haja chattà in apparat dubius en il camiun. I na saja dentant anc betg cler da tge ch'i sa tractia. Ins na possia er betg sclauder ina bumba.
Tenor il procuratur public, Hans Ihrman, mussian blers indicis che l'attentat saja pli probabel stà in act terroristic. Ussa vegnian intercurrids il telefonin da l'um arrestà e sias activitads en las raits socialas. L'um eria enconuschent a la polizia da segirezza, ins n'haja dentant betg pudì cumprovar colliaziuns extremisticas.
Per las unfrendas da l'attatga datti glindesdi ina ceremonia commemorativa ed ina minuta da silenzi en l'entir pajais.
Las mesiras
Il mument vegnia il cas examinà. La polizia ha appelà gist suenter l'attatga a la populaziun da restar en las chasas e da betg vegnir en il center da la citad. La polizia ha serrà ed isolà il palazi e la sedia da la regenza. Il traffic public è era stà sistì, per gronda part fin venderdì saira. Ils ospitals èn stads en stadi d'alarm.
Facebook ha activà ses «Safety check»
Reacziuns sin l'incident
«In'attatga sin in commember da l'Uniun europeica è in'attatga sin nus tuts», scriva il president da la cumissiun da l'UE, Jean-Claude Juncker en sia reacziun.
Il secretari general da la NATO, Jens Stoltenberg, ha sincerà, che l'organisaziun saja tut tar la populaziun svedaisa contristada.
RR novitads 16:00+