Siglir tar il cuntegn
cuntegn

Exteriur Stemprà «Ophelia» ha chaschunà 3 morts en Irlanda

En il sid da l'Irlanda procura l'anteriur hurrican «Orphelia» per caos. Millis persunas èn senza electricitad. Scolas ed uffizis èn restads serrads. Trais persunas èn mortas.

Purtret da l'Irlanda, ina costa dasper la mar, cun grondas undas.
Legenda: «Ophelia» è per il mument vid furiar sur l'Irlanda. Keystone

Tenor las autoritads èn passa 210'000 chasadas senza electricitad. Il servetsch meteorologic ha proclamà per l'entir pajais il pli aut stgalim d'alarm. I vegn fatg quint cun spertadads da vent da fin 150 kilometers l'ura. Scolas e bajetgs publilcs èn serrads a l'eroport da Dublin èn vegnids stritgads 130 sgols.

Trais persunas èn mortas pervi dal stemprà. In um ed ina dunna èn mortas pervi d'ina planta ch'è cupitgada sin lur auto. In um è mort pervi d'in accident cun ina resgia a motor. El haja sco para empruvà da pinar ina planta cupitgada, uschia la polizia.

Millis senza electricitad

Tenor il pledader d'in provedider d'electricitad sajan passa 210'000 chasadas senza electricitad. Ina part da l'armada irlandaisa è sin pichet. Il primminister da l'Irlanda, Leo Varadkar ha supplitgà la populaziun da restar a chasa enfin ch'il stemprà è vargà. I saja in stemprà malsegir, tar l'ultim stemprà da questa dimensiun hajan 11 persunas pers lur vita.

Stemprà tira enavant en direcziun Gronda Britannia

Era parts da al Gronda Britannia quintan cun il stemprà. Il servetsch meteorologic ha avertì da material che pudess sgular tras l'aria. Datiers da la costa pudessi dar che l'electricitad dat ora u inundaziuns. En l'Irlanda dal nord èn las scolas era restadas serradas.

«Ophelia» sveglia tar blers las regurdanzas vi dal «Great Storm» (Stemprà grond) dals 16 d'october 1987. Tar quai stemprà èn mortas 18 persunas en Gronda Britannia.

RR novitads 18:00