Siglir tar il cuntegn
Inhalt

Exteriur Stemprà chaschuna morts en la Caribica

Almain 32 persunas èn mortas pervi dal hurican «Maria». Passa 4'000 persunas han stuì ir en segirezza.

In lieu inundà cun chasas e duas persunas che traversan l'aua sin chavals.
Legenda: Il hurican «Maria» ha devastà Puerto Rico. Keystone

Almain 32 persunas han pers la vita en il stemprà «Maria» en la Caribica. Sulet sin l'insla Puerto Rico sajan mortas 15 persunas, quai tenor medias localas. Blers d'els sajan najads en la regiun Toa Baja ch'è cumplettamain inundada. Puerto Rico che tutga tar il territori da l'USA saja vegnì devastà cumplettamain, ha ditg il president american Donald Trump.

Era sin l'insla vischina da la Republica Dominicana ha il stemprà chaschunà inundaziuns. Là sajan 350'000 abitants senza current electric. Il president da la republica, Danilo Medina, ha convocà ina sesida da crisa.

Per il mument sa chatta il hurican puspè sur il mar avert. Cun ina spertezza da passa 200 kilometers per ura sa movia il hurican uss en direcziun da las inslas Turcs e Caicos ed il sidost da las Bahamas. I saja da quintar cun ferma plievgia e bovas. Tenor prognosas actualas na tutgia il stemprà probabel betg directamain ils Stadis Unids.

RR novitads 08:00