Siglir tar il cuntegn
Inhalt

Exteriur Stadis Unids vulan mantegnair las sancziuns cunter la Russia

La nova regenza americana vul mantegnair vinavant las sancziuns cunter la Russia, che la regenza Obama aveva decretà pervi da l’annexiun russa da la peninsla Crim.

Haley durant la sesida.
Legenda: La nova ambassadura americana da l'ONU, Nikki Haley, durant ina reuniun dal cussegl da segirezza a New York. Keystone

Las mesiras duain restar «fin ch'il pajas dà enavos a l'Ucraina la controlla da la peninsla Crim» ha ditg la nova ambassadura americana da l'ONU, Nikki Haley, durant ina reuniun dal cussegl da segirezza a New York.

USA condemnescha «agir agressiv» da la Russia

A medem temp ha ella condemnà l'agir agressiv da la Russia en l'ost da l'Ucraina. La regenza americana sa stentia bain per meglras relaziuns cun Moscau - la situaziun sgarschaivla en l'Ucraina pretendia però ina clera sentenzia envers l'agir da la Russia, ha ditg Haley.

Auto e via donnegiada.
Legenda: Las vias da Donetsk suenter in’attatga d’artilleria en l’ost da l’Ucraina. Keystone

Russia constatescha tuttina «midament da tun»

Er sche la posiziun communitgada da Haley na sa differenziescha betg da quella expressa da l’administraziun Obama, di l’ambassadur russ, Witali Tschurkin, dad avair remartgà in «midament dal tun». Tenor Tschurkin sa tractia «dal cumenzament dad ina via» che maina forza ad in contact «pli constructiv».

Cumbats intensivads sco «test» per politica da Trump

Durant ils ultims dis èn il cumbats en l’ost da l’Ucraina vegnids pli intensivs. Medias en ils Stadis Unids avevan valità quai sco «test» per la politica da Trump cun la Russia. Tar ils cumbats tranter schuldada ucranaisa e rebels pro-russ èn vegnids per la vita almain 23 umans.

RR novitads 06:00