Il schef da stadi tirc Recep Tayyip Erdogan fa numnadamain responsabels ils aderents da Gülen per il putsch. Il predicatur Gülen sez che viva a Pennsylvania, refusescha las reproschas e sa distanziescha dal putsch. El è dentant gia dapi il 2013 malperina cun Erdogan, gia lu ha Erdogan renfatschà da vulair far in putsch.
Tenor John Kerry examinassan ils Stadis Unids ina dumonda da la Trichia d'extrader il predicatur Gülen. Ina tala dumonda n'haja dentant anc betg da fin uss, uschia Kerry vinavant.
Qua vai tar la bilantscha da l'emprova da putsch che ha fatg naufragi.
Germania e Frantscha condemneschan l'emprova da putsch
La chanzeliera tudes6tga Angela Merkel ha condemnà sin il pir l'emprova da putsch. I saja tragic che tantas persunas hajan stuì pajar l'emprova da putsch cun la vita. Il sponder sang en Tirchia stoppia uss avair ina fin. I saja il dretg dal pievel da decider tgi che regia.
Er la regenza franzosa ha condemnà l'emprova da cupitgar la regenza. La Frantscha speria però che la democrazia tirca daventia pli ferma suenter quest act da violenza, uschia il minister franzos Jean-Marc Ayrault.
Grezia en in dilemma diplomatic
Otg schuldas tircs ch'èn sa participads a l'emprova da putsch en sa tschentads cun in helicopter da l'armada tirca en la Grezia ed han dumanà per asil politic. D'ina vart è la Grezia obligada tenor dretg internaziunal da tractar lur dumondas, da l'autra vart han ils schuldads cuntrafatg a la constituziun tirca.
En in emprim pass duai il helicopter vegnir transportà enavos en Tirchia. Suenter veglia la Grezia nizzegiar tut las pussaivladads diplomaticas da sa barattar cun la Tirchia, uschia la pledadra da la regenza. La Tirchia aveva pretendì d'extrader ils schuldads immediatamain suenter ch'els eran sa tschentads.
Declarà ils 15 da fanadur sco di da festa da la democrazia
Il parlament tirc è sa radunà en la chapitala Ankara per ina sesida extraordinaria. Là ha il primminister tirc Benali Yildirim engrazià a las partidas per il sustegn e declerà ils 15 da fanadur sco di naziunal da festa per la democrazia.
RR novitads 17:00
