Siglir tar il cuntegn
Inhalt

Exteriur Stadis Unids: Grand Jury duai examinar en l'affera cun la Russia

L’investigader spezial Robert Mueller ha instradà ina «Grand Jury». Quai per examinar, sche la Russia ha influenzà il cumbat electoral dals Stadis Unids e sch’i ha dà cunvegnas cun Moscau, scriva il «Wall Street Journal». In motiv per Trump d’esser preoccupà, din experts da dretg americans.

Il president russ Waldimir Putin ed il president american Donald Trump durant l'inscunter G20 a Hamburg.
Legenda: Ha la Russia influenzà il cumbat electoral en ils Stadis Unids? – Quai duai ina Grand Jury examinar. Keystone

La Grand Jury ha gia cumenzà cun sia lavur avant emnas, scriva il «Wall Street Journal» sa referind sin persunas ch’enconuschan l’affar. La gasetta valitescha quest pass sco segn che Robert Mueller, l’anteriur schef dal FBI ed investigader spezial en chaussa, ha extendì ed intensivà sias retschertgas.

Sclerir sch’i duai vegnir accusà

L’incumbensa principala d’ina Grand Jury è d’examinar las cumprovas ch’èn avant maun e da decider sch’i duai dar ina accusaziun u betg. Quest gremi da burgais che po consister fin a 23 commembers vegn perquai era savens numnà chombra d’accusaziun. Per il pli vegnan ellas instradadas, sch’i sa tracta da cas pli gronds e cuntravers.

Cun instradar ina Grand Jury survegnan ils investigaders era dapli pussanza. Els pon uschia citar persunas per interrogar quellas sut sarament ed els pon era pretender invista en documents, empè da mo pudair dumandar per quels. La procedura da la Grand Jury n’è betg publica ed ha uschia lieu davos portas serradas.

Raschun d’esser preoccupà

Che Mueller haja instradà quest gremi da burgais, mussia ch’el na laschia betg tementar en sia lavur, han differents experts da dretg ditg en la televisiun americana la gievgia saira en connex cun l’agir da l’investigader spazial en l’affera da la Russia. Per Trump saja quai en mintga cas in motiv d’esser preoccupà. Il gremi saja l’entschatta d’ina nova fasa en las inquisiziuns.

Per Trump be ina ficziun totala

Il president american sco er la Russia refusan las renfatschas. Davant aderents en il stadi federativ da West Virgina ha Donald Trump numnà l’affera russa mo ina ficziun totala che vegnia instrumentalisada dals democrats.

RR novitads 06:00

Grand Jury

Ina Grand Jury sa cumpona da 12 fin 23 burgais ch'examineschan mussaments da la procura publica. Els decidan lura sche quels bastan per in'accusaziun. Ulteriurs pensums da la Grand Jury èn d'intercurrir cas da corrupziun en l'administraziun publica e d'examinar las cundiziuns en las praschuns.