Siglir tar il cuntegn

Header

cuntegn

Exteriur Stadis G20 smanatschan ad oasas da taglia

Scuvertas sur da tschientmillis firmas da chaschas da brevs anonimas en il Panama duain avair consequenzas. Las naziuns d’economia dominantas vulan cumbatter pli massiv il fraud da taglia e la lavada da daners. Quai han ils ministers da finanzas dals G20 annunzià suenter discurs a Washington.

Suenter las scuvertas davart firmas da chaschas da brevs anonimas en il Panama augmentan ils stadis G20 il squitsch sin las oasas da taglia.

Barat d'infurmaziuns automatic tranter ils stadis

En ina decleraziun communabla han ils ministers da finanzas dals pli impurtants pajais industrials annunzià mesiras cunter pajais e centers da finanzas che na coopereschian betg. Ils ministers èn er s'exprimids per ina publicaziun dals tirafils che stattan davos las firmas d'offshore.

Ils stadis G20 han surlaschà al minister da finanzas chinais Lou Jiwei d’annunziar la nov lingia pli dira; la finala presidiescha la China actualmain il club exclusiv. Il minister ha adressà tuts pajais relevants e centers da finanzas e pretendì da sa declerar pront per il barat d’infurmaziuns automatic – e quai senza retardament.

Stadis Unids anc betg da la partida

Fin uss sa participeschan radund 100 stadis al barat automatic da datas da taglia e finanzas per reducir l'omissiun fiscala e la lavada da daners. La Svizra è da la partida.

Anc betg da la partida èn ils Stadis Unids da l’America. Quai malgrà ch’igl è cler a tuts che tuts sforzs na pon betg avair success senza la pli impurtanta naziun economica dal mund.

RR novitads 06:00

Artitgels legids il pli savens