Stadi islamic resta in privel

Malgrà las terradas militaras resta la milissa terroristica Stadi Islamic privlusa. Quai resulta d'in rapport d'experts per il Cussegl da segirtad da l'ONU.

3 commembers dal Stadi Islamic.

Legenda da maletgs: Entant emprovan ils dschihadists da rinforzar lur pussanza en l'Asia dal sid-ost. Keystone

Er cun il squitsch da la coaliziun cunter il Stadi Islamic saja la milissa ordaifer il territori da conflict abla da trametter daners a ses cumbattants en Siria e l'Irac. Il transfer da questas summas saja grev da scuvrir perquai ch'i saja mo summas pitschnas.

Tenor il rapport survegn la milissa da terror ses daners vinavant da fatschentas cun ieli e taglias ch'ella incassescha da la populaziun en ils territoris conquistads. Pervia dal squitsch militaric sa pegiurescha la situaziun finanziala da la gruppa da terror però adina pli fitg.

Damain cumbattants da terror da l'exteriur

La milissa saja vinavant abla da commetter attatgas ordaifer il Proxim Orient, hai num vinavant. Quai valia tranter auter per l'Europa, che gioghia vinavant la rolla centrala per ils extremists.

Il dumber dals cumbattants da terror da l'exteriur en Siria e l'Irac sa reduceschia però. Surtut giuvens sa retirian adina dapli ord las regiuns da cumbat.

RR novitads 11:00