Siglir tar il cuntegn
Inhalt

Exteriur St. Petersburg è paralisà dal terrur

La populaziun da St. Petersburg è vegnida surpraisa da l’attatga da glindesdi en la metro a St. Petersburg. L'attatga è probablamain vegnida fatga d'in attentader da suicid. Almain 11 persunas èn mortas e bunamain 50 persunas blessadas.

  • En in tren da la metro da St. Petersburg hai dà glindesdi in'explosiun.
  • Las autoritads supponan in'attatga terroristica.
  • L'explosiun en la metro è tenor in'agentura da novitads russa vegnida fatga d'in attentader da suicid.
  • La persuna suspectada saja 23 onns e derivia da l'Asia centrala. Quai tenor l'agentura Interfax che sa referescha sin infurmaziuns or dal circul da las autoritads da segirezza russas.
  • Davart la cifra da las unfrendas datti differentas indicaziuns. Almain 11 persunas èn mortas. Da las var 50 persunas blessadas an numerusas grevas blessuras.

En consequenza da l'explosiun èn tut las staziuns da metro en il center da St. Petersburg vegnidas evacuadas. La raschun per l'explosiun, ubain tgi ch'è responsabel per ella, n'è anc betg enconuschent. Las autoritads supponan dentant ch'i sa tractia d'in'attatga terroristica. Ellas tschertgan dus suspectads.

En in vagun da la metro a St. Petersburg saja explodì in object nunenconuschent, rapportan agenturas da novitads russas e sa refereschan sin indicaziuns da la viafier pertutgada.

vladimir putin
Legenda: Il president russ Vladimir Putin gesticuleschan durant ses inscunter cun il president bieloruss Alexander Lukaschenko a St.Petersburg. Keystone

Il president da la Russia Wladimir Putin è s'inscuntrà glindesdi a St. Petersburg cun il president da la Bielorussia Alexander Lukaschenko. Tenor Putin vegnia ussa sclerì, sch'i sa tractia d'in act terroristic, rapporta l'agentura da novitads russa Interfax.

Nus considerain per il mument tut las pussaivladads – sch'i saja in act criminal ubain sch'i saja in act da caracter terroristic.
Autur: Wladmir PutinPresident da la Russia

En il temp passà aveva quai dà differentas explosiuns en la metro a Moscau. A St. Petersburg n’haja quai fin ussa però betg dà attentats, rapportan agenturas da novitads.

Reacziun da la Confederaziun

Entant è la presidenta da la Confederaziun Doris Leuthard sa mussada consternada. Mintga furma da violenza saja da condemnar cun vehemenza, ha ditg Doris Leuthard.

Flurs dal president Putin

Era il president Wladimir Putin ha vistià glindesdi saira la staziun da metro. El ha commemorà a las unfrendas cun deponer fluras.

USA sustegna la Russia

Trump ha confermà en in telefonat cun Putin «il cumplain sustegn da la regenza dals Stadis Unids da l'America tar la reacziun sin l'attatga». Ombadus schefs da stadi eran da l'avis ch'il terrorissem sto vegnir cumbattì spert e cun tutta forza.

RR novitads 15:00+