La WHO – l’organisaziun da sanadad mundiala – examinescha schebain ils gieus olimpics a Rio en la Brasilia ston vegnir spustads. Il motiv per quest’examinaziun è in privel pussaivel tras il virus da Zika.
Ristg d'infecziun per mez milliun persunas
Il comité responsabel per cas d’urgenza duai intercurir ils ristgs per ils gieus olimpics ch’èn planisads per l’avust. L’organisaziun vul publitgar ils resultats uschè svelt ch’ils experts han terminà las retschertgas.
Avant in'emna han passa 150 experts avertì ch'il virus da Zika che regna il mument en la Brasilia pudess sa derasar sin l'entir mund pervi dal grond dumber d'atlets ed aspectaturs che vegnan als gieus olimpics (ca. 500’000 persunas). Da manar tras ils gieus sco planisà saja irresponsabel ed immoral.
RR novitads 12:00