Siglir tar il cuntegn

Header

cuntegn

Exteriur Spusalizi gigantic - Bayer vul cumprar Monsanto

Il concern da chemia e farmazia tudestg Bayer vul cumprar il producent da semenza american Monsanto. Quai per 62 milliardas dollars – sco Bayer communitgescha.

Uschia paja Bayer 122 dollars per aczia. Monsanto è il pli grond producent da semenza dal mund. Cun surpigliar il concern american daventass Bayer il pli grond concern d'agro-chemia dal mund.

Ils martgads n'han betg mussà gust da l'annunzia da Bayer

Sin ils martgads d’aczias na para il gust da questa novitad betg dad esser uschè grond: Suenter la communicaziun perda l’aczia da Bayer 3,6% e vegn vendida uschia tar il pretsch il pli bass dals 2,5 onns passads.

Tenor analists arrivia Bayer bain da supportar ina cumpra da Monsanto per 62 milliardas dollars. Els èn dentant da l’avis che la flexibilitad strategica da Bayer vegnia limitada uschia. In autra sfida per Bayer saja l’image da Monsanto. Il concern american vegn crititgà pervi da sia pratica d’affar agressiva e ses products transfurmads geneticamain.

Spusalezis e maridaglias tranter gigants

L'emna passada avevan ils dus concerns confermà discurs da surpigliada. Cura che la transacziun saja finida dependai da la reacziun da Monsanto, communitgescha Bayer. En pli annunzia il concern tudestg da vulair sviluppar ses portfolio en il sectur farmaceutic.

Anc l’onn passà era Monsanto il concern offensiv: el vuleva surpigliar il concern svizzer Syngenta. Cunquai che Syngenta era sa defendì vehementamain era Monsanto sa retratg l’avust passà. Sche tut las autoritads dattan lur consentiment, vegn Syngenta cumprà – cun agen consentiment - dal gigant da chemia chinais ChemChina.

RR novitads 09:00

Artitgels legids il pli savens