Siglir tar il cuntegn

Header

Navigaziun

L'actur da film Daniel Craig
Legenda: Daniel Craig, l'actur da film, avant la premiera dal nov film da James Bond. Keystone
cuntegn

Exteriur «Spectre» - Bond turna enavos tar las ragischs

Il nov film da James Bond na cuntegn betg mo acziun pauc realistica mabain er scenas pli ruassaivlas, dat dapli paisa a l'istorgia da las persunas e Bond ha schizunt puspè in zic humor.

L'istorgia

Il nov schef dal Centre for National Security, C (Andrew Scott) na vul betg pli ils agents da 00 perquai ch'els na corrispundian betg pli al temp. El vul in nov sistem electronic da surveglianza totala enstagl d'agents. Perquai sto James Bond cumbatter tant encunter il nausch sco er per sia plazza.

Ses schef dal MI6, M (giugà da Ralph Fiennes), sia secretaria Moneypenny (Naomie Harris) sco er il talent d'informatica Q (Ben Whishaw) en da sia vart. E cun la biala Madeleine Swann (Léa Seydoux) chatta Bond aunc ulteriur sustegn per cumbatter l'organisaziun criminala Spectre.

Betg mo action

Il reschissur Sam Mendes dat dapli paisa a la pre-istorgia da las persunas e pren si elements dals films passads. Uschia èn per exempel tut ils adversaris da Bond dals davos films er stads commembers da l' organisaziun Spectre. Las scenas ruassaivlas nua che Bond s'inscuntra ubain cun las bellas dunnas ubain cun ses cumplizis survegnan dapli paisa. Per fans dad action pon quellas scenas tut tenor esser massa lungas. Sco er l'entir film ch'è cun bunamain 2 uras e mez il pli lung Bond da tuts fin uss.

Christoph Waltz e Monica Belluci

Monica Belluci va bunamain in zic a perder en il film. Sia rolla è mo curta. Christoph Waltz sco nausch fa quai bain realistic, dentant pudess el esser anc in zic pli nausch e diabolic, quai almain tenor il criticher da film da SRF, Reto Bär.

Facit

Spectra è baingartegià e porscha dapli che mo action e sa postescha zanua tranter il realissem brutal da Casino Royale (2006) e l'antecessur da Daniel Craig, Pierce Brosnan ch'era plitost fantastic ed elevà.