SPD gudogna elecziuns a Berlin – AfD vegn sin 14,2%

La AfD dumogna uschia senza problem il sigl en il parlament regiunal da Berlin. La SPD resta la partida la pli ferma. Ella sto dentant tschertgar novs partenaris da coaliziun.

Politichers tudestgs.

Legenda da maletgs: Drova dus novs partenaris da coaliziun per pudair reger a Berlin: La SPD. Keystone

SPD vinavant la pli ferma partida

Las elecziuns dal parlament da Berlin gudogna la SPD dal burgamester actual Michael Müller. Cun 21,6% resta la SPD la pli ferma forza en la chapitala. Ella perda dentant 6,7% cumpareglià cun la davos'elecziun avant 5 onns. Quai ha communitgà la cumissiun electorala. Uschia sto Müller tschertgar dus novs partenaris da coaliziun. Tenor experts è ina coaliziun cotschen-cotschen-verda la pli probabla.

Terrada per CDU

La CDU che furma communabel cun la SPD la regenza actuala vegn sin 17,6%. La partida sanestra «Die Linke» vegn tenor la prognosa sin 15,6% e la AfD sin 14,2%. Era la FDP ch’era betg pli represchentada po returnar en il parlament da Berlin cun 6,5% da las vuschs. Per la CDU e la SPD munta quest resultat il mender en l'istorgia.

Auta participaziun

Tar las elecziuns da Berlin è la participaziun stada auta. Sco la manadra da las elecziuns da Berlin ha communitgà è la participaziun stada tar 66,8%. En blers locals avevi dà colonas. Bun 2,5 milliuns votantas e votants èn stads clamads a l'urna per reparter ils 130 sezs dal parlament dal Bundesland Berlin.

RR novitads 18:00+