Siglir tar il cuntegn
Inhalt

Exteriur Spagna pretenda clera posiziun da Puigdemont

Avair dus mais temp per manar in dialog – quai propona il president regiunal da la Catalugna Carles Puigdemont al primminister spagnol Mariano Rajoy. La regenza spagnola percunter pretenda uss da la regenza catalana da declerar fin gievgia, ch'ella n'haja betg proclamà l'independenza

Soraya Saenz de Santamaria, la vice-primministra da la Spagna.
Legenda: Soraya Saenz de Santamaria, la vice-primministra da la Spagna. Keystone

Il schef da la regenza catalana Carles Puigdemont propona en ina brev a la regenza spagnola da laschar ruassar per dus mais il mandat ch'el haja survegnì dals Catalans areguard l'independenza da la Catalugna – quai per pudair manar contractivas cun la regenza centrala. Puigdemont pretenda en la brev a Mariano Rajoy da s'inscuntrar pli spert pussaivel per cumenzar in dialog.

Ultimatum fin gievgia

Entant ha la regenza spagnola reagì e pretendì da Puigdemont ch'el decleria fin gievgia da betg avair proclamà l'independenza. Quai ha ditg la vice-primministra Soraya Saenz de Santamaria il glindesdi a Madrid avant las medias. Mintga dialog stoppia succeder en il rom da las leschas. La gronda part dal parlament spagnol sustegnia la tenuta da la regenza centrala.

Rajoy aveva pretendì da Puigdemont fin oz, glindesdi, a las 10:00 ina clera resposta, sch'el haja propi proclamà il mardi passà l'independenza avant il parlament regiunal a Barcelona. Anc la sonda aveva la regenza spagnola avertì, ch'ina resposta betg clera, vegnia chapida sco proclamaziun da l'independenza.

Sche la regenza regiunala da la Catalugna na declara betg fin gievgia, ch'ella n'haja betg proclamà l'independenza, èsi pussibel che la regenza centrala privescha Puigdemont e ses cabinet da la pussanza.

RR novitads 09:00