- La cella da terror da Barcelona aveva mantunà almain 120 buttiglias da gas en la chasa ad Alcanar.
- La polizia suppona ch'ulteriuras attatgas eran planisadas a Barcelona.
- Sch'il suspectà principal da 22 onns è anc en Spagna, è intschert. Ella ha extendì la tschertga sin l'entir'Europa.
Tar ina conferenza da pressa ha la polizia communitgà che las buttiglias emplenidas cun butan sajan vegnidas chattadas en ina chasa ad Alcanar. Probabel sajan quellas stadas quintadas per ulteriuras attatgas en la metropola catalana, suppona la polizia. Pervi dad in'explosiun en la chasa la mesemna, sajan ils plans primars vegnids disturbads. Sinaquai hajan ils attatgaders fatg duas attatgas cun autos a Barcelona e Cambrils la gievgia e la notg sin venderdi.
Mo ina persuna en auto
Ultra da quai ha la polizia infurmà ch'ils investigaders quintian che mo ina singula persuna saja stada en il van che saja charrà en la fulla da persunas. Tgi che saja però stà il manischunz, na saja il mument anc betg cler. Er saja intschert sch'il suspectà principal sa chattia insumma anc en il pajais u sch'el saja mitschà en Frantscha, han ditg las autoritads spagnolas. La tschertga da l'um saja vegnida extendida sin l'entir'Europa.
Siglì cun auto en persunas
Tar l'attatga sin il boulevard «Las Ramblas» eran almain 13 persunas vegnidas mazzadas la gievgia. Be paucas uras pli tard è ina dunna morta en la citad da costa Cambrils en il sid da Barcelona. Ella era vegnida charrada da suspectads en fugia.
Ils investigaders supponan che las attatgas da Barcelona e Cambrils sajan vegnidas fatgas dad ina rait che sa cumponia da radund in tozzel da suspectads.
Messa per las unfrendas
Per sa regurdar da las unfrendas da las attatgas da terror hai dà la dumengia ina messa funerala en la baselgia Sagrada Familia a Barcelona. Celebrà la messa cun il motto «Ceremonia per la pasch» ha l'archuvestg da Barcelona.
Preschentas èn stadas tschients da persunas, tranter quellas er il pèr roial spagnol Felipe VI e Letizia, sco era numerus politichers. Cartents han ditg ch'els n'hajan betg udì ad uras da la messa planisada.
RR novitads 14:00