- La regenza da la Gronda Britannia ha dumandà per in spustament dal termin da Brexit.
- Sonda suentermezdi era vegnì approvà il Letwin-Amendment cun 322 cunter 306 vuschs.
- Quai munta ch'il deal da Brexit na po betg vegnir approvà avant che la realisaziun concreta dal contract per bandunar l'UE è vegnida approvada.
- Il primminister Boris Johnson sto tenor lescha dumandar l'Uniun europeica da spustar la data da Brexit ch'è il mument fixada sin ils 31 d'october.
- Il parlament da l'UE sto approvar il contract e pudess far quai teoreticamain gia la gievgia proxima.
La regenza da la Gronda Britannia ha uss tuttina dumandà per in spustament dal termin da Brexit ch'è fixà sin ils 31 d'october. Quai ha ditg Johnson durant in telefon cun il president da la cumissiun da l’Uniun Europeica Donald Tusk. Tusk ha silsuenter confermà via Twitter che la dumonda sajan vegnida inoltrada. El veglia uss discutar cun ils schefs da regenza dals stadis commembers sco reagir sin la dumonda da Londra, uschia Tusk vinavant.
Suenter la decisiun dal parlament da spustar la votaziun davart la cunvegna actuala ch'è sin maisa aveva Johnson declerà en in'emprima reacziun ch'el vegnia er vinavant a far tut per bandunar l'Uniun Europeica a temp, fin ils 31 d'october.
Pervia ch'il deal actual vegn per tractà pir pli tard dal parlament britannic entra il «Ben-Act» en vigur. Quel sforza Boris Johnson da dumandar l'UE da spustar il termin da Brexit. I vegn dentant tuttina spetgà che Johnson emprova uss vinavant da vegnir tras cun la cunvegna en il parlament e quai gia glindesdi. Mardi pudessi lura gia dar ina proxima votaziun davart la segunda prelecziun da la cunvegna. Sche questa lescha vegniss approvada, po Johnson tuttina anc quintar cun il sustegn per il deal.
Juncker pretenda decleraziuns
Suenter ch'il parlament ha spustà la votaziun davart il nov deal da Brexit, spera il president da la cumissiun da l'UE Jean-Claude Juncker sin decleraziuns da Londra. «Igl è ussa chaussa da la regenza britannica d'infurmar nus uschè svelt sco davart ils proxims pass», ha declerà la pledadra da Juncker, Mina Andreeva. Ella ha accentuà ch'i na saja anc betg vegnì votà davart la cunvegna da Brexit sezza. In pledader dal schef dal cussegl da l'UE, Donald Tusk n'ha betg vulì commentà ils eveniments a Londra.
Cunvegna surprendenta cun l'UE
Quest'emna ha Johnson dumagnà da chattar ina cunvegna cun Brüssel. Quai cunter tuttas spetgas. Punct il pli central era stà co ins vegnia d'evitar in cunfin dir tranter l'Irlanda dal nord e l'Irlanda. Il Backstop ch'era punct dispitaivel en la cunvegna che Theresa May aveva proponì, ha Johnson pudì remplazzar cun in'alternativa.
Ma la DUP protestanta da l'Irlanda dal nord n'ha betg vulì purtar questa pussaivladad. Cun quai han mancà impurtantas vuschs a Johnson. Uschè u uschia ha Johnson stuì sperar anc sin il sustegn da l'opposiziun, pertge la maioritad n'ha Johnson betg. Sia antecessura, Theresa May ha fatg naufragi trais giadas cun sia cunvegna.
Ils Brits avevan decidì avant trais onns – la stad 2016 – cun ina stretga maioritad da sortir l'Uniun europeica.
RR novitads 12:00++
